Dimars lo 08 de mai passat que’s debanè lo tradicionau
tornèu de rugbí de l’URBR (Union Rivière Basse Rugby) a Plasança-deu-Gers. Alavetz, l’associacion
nosta, qu’i èra convidada entà portar la soa tòca gascona ! Atau, qu’organisèm
au briu de la jornada un concors de jòcs tradicionaus (quilhas e palet gascon)
entau joenèr. Lo conselh generau deu Gers
e la mèrca Adishatz qu’estón los nostes partenaris. Los miélhers que s’en podón
tornar tà casa sia dab un quessòt « Adishatz »,
un bonet deu « CG », un quessòt « adishatz monde » deu «
CG » o enqüera ua affica « Lo rugbí en gascon ». Aquèra
affica qu’estó creada peus conselhs generaus deu Gers e deus Pirenèus hauts.
Cada vilatge on se tròba un « Club » qu’i ei dab lo son nom gascon
sus ua carta. Tanben qu’i podetz léger lo vocabulari deu rugbí en bilingue atau plan com quauquas expressions
pròpias a l’espòrt. Au hiu de la jornada que demandèm tanben aus joens jogaires
de s’en anar cercar l’arrevirada gascona de quauques mots com Le ballon, les poteaux, aller au contact…
las afficas qu’èran visiblas drin pertot
entaus ajudar. Presents qu’estón balhats aus mei rapides.
En fin de jornada, que’s debanè la remesa deus premís deu
concors de jòcs tradicionaus en preséncia de M. Castet (Conselher generau) e de
Dauna Musset (represententa de la mairia de Plasança).
Aban de partir los musicians d’Alavetz qu’animèn l’aperitiu
au son de la flabuta e de l’acordeon.
Lo pretzhèit de la jornada que volèva la cultura nosta qu’estosse
visible dens un eveniment public, dedicat au joenèr, e auprés de monde qui’n
son pas forçadament iniciats tà d’aquèra cultura.
La jornada qu’estó ua vertadera escaduda !